འདྲ་དབང་སྲིད་བྱུས།

རིག་མཛོད་དུས་དེབ་ཀྱིས་ ཨ་མི་རི་ཀའི་སེམས་ཁམས་རིག་པའི་ཚོགས་པ་ (APA) གིས་ གཞི་བཙུགས་འབད་དེ་ཡོད་པའི་ ལུང་འདྲེན་དང་རྒྱབ་རྟེན་བཀོད་ཐངས་ལུ་  གཞི་བཞག་སྟེ་བཟོ་ཡོད་པའི་ རྫོང་ཁའི་ ཨེ་པི་ཨེ་འདི་ ལག་ལེན་འཐབ་དོ་ཡོདཔ་ཨིན།

རྩོམ་ཡིག་འདྲ་བཤུས་ཟེར་མི་འདི་ གཞན་གྱིས་བྲིས་དེ་ཡོད་པའི་རྩོམ་ཤོག་ རང་གིས་ཨིནམ་བཟུམ་བཟོ་སྟེ་ རྩོམ་པ་པོའི་མིང་རྟགས་ཚུ་ག་ནི་ཡང་མ་བཀོད་པར་ རང་གི་མིང་ཐོག་ཁར་བཀོད་མི་འདི་ལུ་སླབ་ཨིན། དེ་བཟུམ་གྱི་ རྩོམ་ཤོག་འདྲ་བཤུས་འབད་ནི་འདི་ ཤེས་ཡོན་གྱི་ཆིག་སྒྲིལ་དང་ བརྡ་བརྒྱུད་ཀྱི་ཀུན་སྤྱོད་ཚུ་ལས་ འགལ་བ་འབད་མི་ཅིག་ཨིནམ་ད་ འདི་ཡང་ གཞན་གྱི་ལཱ་འདི་ལུ་ ངོས་ལེན་མེད་པར་ རང་གི་ལཱ་སྦེ་ གསལ་བཀོད་འབད་ནི་ལས་འཛེམས་དགོ།

དེ་བཟུམ་གྱི་གནས་སྟངས་འདི་ཡང་ རང་གིས་རྩོམ་འབྲི་འབད་བའི་སྐབས་དང་ པར་སྐྲུན་འབད་བའི་སྐབས་ རྩོམ་བྲིས་པ་གིས་ རྩོམ་ཡིག་གི་ཆ་ཤས་གལ་ཅན་ཚུ་ ལུང་འདྲེན་ལེགས་ཤོམ་མ་འབད་བར་བཞག་སྟེ་ པར་སྐྲུན་འབད་བའི་སྐབས་ལུ་ འབྱུང་དོ་ཡོདཔ་ཨིན། འདི་ཡང་ རང་གི་རྩོམ་ཤོག་ནང་ལུ་ ཧེ་མའི་ཞིབ་འཚོལ་འབད་ཡོད་པའི་གནས་སྡུད་མང་སུ་དང་  གནས་སྡུད་གསརཔ་ཉུང་སུ་ཅིག་ཁ་སྐོང་བཀོད་མི། དེ་ལས་ དུས་དེབ་གཞན་ཚུ་ནང་ལུ་ པར་སྐྲུན་ཅོག་འཐདཔ་འབད་མི་ཚུ་ཚུདཔ་ཨིན། འདི་མ་ཚད་ རྩོམ་འབྲི་པ་གཞན་མི་ཅིག་གི་ ཤོག་གུའི་ཆ་ཤས་དང་པར་རིས། ཐིག་ཁྲམ། ཡང་ན་ རི་མོ་བཟུམ་གྱི་ནང་དོན་ཚུ་ ངོས་ལེན་མེད་པར་ལག་ལེན་འཐབ་མི་དང་ ཡང་ན་ ལུང་འདྲེན་མ་འབད་བར་ ཡོངས་འབྲེལ་ནང་ལས་ པར་རིས་ཚུ་ལག་ལེན་འཐབ་མི་ཚུ་ཡང་ཚུདཔ་ཨིན། སྤྱིར་བཏང་ རྫོང་ཁའི་རྩོམ་ཤོག་ཚུ་ འདྲ་བཤུས་རྐྱབ་སྟེ་འདུག་ག་མིན་འདུག་ དབྱེ་ཞིབ་འབད་ནི་གི་ འཕྲུལ་རིག་ཚུ་མེད་རུ་ ཡོངས་འབྲེལ་དང་དུས་དེབ་ཚུ་ནང་པར་སྐྲུན་འབད་དེ་འདུག་ག་ མིན་འདུག་རྩོམ་ཤོག་ག་ར་ ཤོ་མཚུངས་སྦེ་དབྱེ་ཞིབ་འབད་ཡོདཔ་ཨིན།

འདྲ་བཤུས་རྐྱབ་སྟེ་ཡོད་པ་ཅིན་ རྩོམ་འབྲི་པ་ཚུ་ལུ་ ལེགས་བཅོས་འབད་ནི་དོན་ལུ་ ལོག་བསྐྱལཝ་ཨིན། པར་སྐྲུན་མ་འབད་བའི་ཧེ་མ་ ད་རུ་ཚར་ཅིག་ འདྲ་བཤུས་རྐྱབ་སྟེ་ཡོད་མེད་ དབྱེ་ཞིབ་འབདཝ་ཨིན། གལ་སྲིད་ ད་རུ་ འདྲ་བཤུས་རྐྱབ་ཡོད་པའི་གནད་དོན་མང་སུ་སྦེ་ འཐོན་སོང་པ་ཅིན་ རྩོམ་ཤོག་འདི་ པར་སྐྲུན་འབད་ནི་ལས་ཆ་མེད་བཏངམ་ཨིན། ཆ་མེད་བཏང་ཚར་བའི་ཤུལ་ རྩོམ་འབྲི་པ་ལུ་ རྩོམ་ཤོག་འདི་ ཆ་མེད་བཏང་དགོ་པའི་གནད་དོན་ཚུ་ ཁ་གསལ་སྦེ་སྤྲོདཔ་ཨིན།