རྒྱ་བོད་གཉིས་ནང་བར་དོའི་དགོངས་དོན་གྱི་འབྱུང་ཁུངས་དང་འཕེལ་རིམ།

Abstract

བཅུད་དོན།

བར་དོའི་རྣམ་གཞག་འདི་ ནང་ཆོས་དང་འབྲེལ་བའི་གནད་དོན་ཅིག་ཨིན་པའི་ཁར་ ལྷག་པར་དུ་ཧི་མ་ལ་ཡའི་གངས་ལྗོངས་ཀྱི་རྒྱལ་ཁམས་ཚུ་ནང་དར་ཡོད་པའི་ གསང་སྔགས་རྡོ་རྗེ་ཐེག་པའི་ཆོས་སྐོར་དང་འབྲེལ་བའི་ གནད་དོན་གལ་ཅན་ཨིནམ་མ་ཚད་ ད་རེས་ནངས་པ་ཡོངས་གྲགས་ཅན་གྱི་ ཆོས་སྐོར་དང་ཐ་སྙད་ཅིག་ལུ་གྱུར་ཏེ་འདུག། ལོ་རྒྱུས་དང་འཁྲིལ་བ་ཅིན་ བར་དོའི་གནད་དོན་འདི་ལུ་ གནས་དུས་ཀྱི་གནས་སྟངས་དང་འཁྲིལ་ འཕོ་འགྱུར་གྱི་རིམ་པ་ལེ་ཤ་བྱུང་ཡོདཔ་ལས་ ཁུངས་བཙན་ཞིབ་འཚོལ་འདི་ནང་ རྒྱ་གར་གྱི་གནའ་དུས་སུ་བྱུང་བའི་ རིག་བྱེད་དང་རིག་བྱེད་མཐའི་ (ཨུ་པ་ནི་ཥད་) གཞུང་དང་ བཀའ་བསྟན་ལ་སོགས་པ་ནང་པའི་རིག་གཞུང་དང་འབྲེལ་བའི་ ཁུངས་ཐུབ་ཀྱི་ཡིག་ཚུ་གི་ནང་དོན་དབྱེ་ཞིབ་ཐོག་ལས་ བར་དོའི་དགོངས་དོན་གྱི་འབྱུང་ཁུངས་དང་འཕེལ་རིམ་ཚུ་ དཔྱད་ཞིབ་འབད་དེ་ཡོད། སྤྱིར་བཏང་ རྒྱ་གར་གྱི་གནའ་དུས་ཀྱི་རིག་གཞུང་ནང་ བར་དོའི་རྣམ་གཞག་འདི་ ཁ་གསལ་སྦེ་གསལ་སྟོན་འབད་ཡོད་པའི་ བདེན་ཁུངས་ཚད་ལྡན་ཅིག་མེད་རུང་ ནང་པའི་རིག་གཞུང་གི་བཀའ་བསྟན་དང་ཡིག་ཆ་མང་རབས་ཅིག་གི་ནང་ བར་དོའི་རྣམ་གཞག་འདི་ རྒྱ་ཆེ་དྲགས་སྦེ་གསལ་སྟོན་འབད་དེ་ཡོད་པའི་ཁར་ ལྷག་པར་དུ་ གསང་སྔགས་རྡོ་རྗེ་ཐེག་པའི་ལམ་སྲོལ་ནང་ དུས་རབས་ལས་བཅད་དེ་ གནས་དུས་ཀྱི་གནས་སྟངས་དང་འཁྲིལ་ བར་དོའི་གོ་དོན་དང་རྣམ་གྲངས་ཚུ་རྒྱ་བསྐྱེད་འགྱོ་ཡོདཔ་མ་ཚད་  ཉམས་ལེན་གྱི་རྣམ་གཞག་ཚུ་གོང་འཕེལ་སོང་སྟེ་ ཧི་མ་ལ་ཡའི་གངས་ལྗོངས་ཀྱི་མི་སྡེ་ཚུ་གི་ ཆོས་དང་ལམ་སྲོལ་ནང་རྒྱ་ཆེ་དྲགས་སྦེ་འབྲེལ་བ་ཡོད་པའི་ གནད་དོན་ཅིག་ལུ་གྱུར་ཏེ་ཡོདཔ་ཤེས་ཚུགས་བས།

གཙོ་ཚིག། བར་དོ། འབྱུང་ཁུངས། འཕེལ་རིམ། རིག་བྱེད། ནང་པ། གསང་སྔགས།